by

Eventu Kompetisaun Tein Produtu Lokal ba Ai-han ho Nutrisaun Diak

Clubu parente hamutuk Grupo 15 tuir kompetisaun tein produtu lokal ba aihan ho nutrisaun bo’ot, ho Tema Loron”produsaun Diak ba nutrisaun diak liu”, nebe organiza husi TOMAK (To’os ba moris diak) nudar progama nebe implementa husi World Vission Timor-Leste Municipio Baucau. Kompetisaun ne’e hala’o iha Sede do Suco Triloka, Posto Administrativo Baucau Villa Municipio Baucau, Tersa-feira ne’e.

Mauricio Gusmao, Coordenador progama TOMAK hateten: Objectivo husi kompetisaun ne’e mak atu sukat membru Grupo sira nia konhesemento kona-ba oinsa atu prepara aihan ho nutrisaun nebe diak ba Familia. Tamba durante ne’e membru Grupo sira hetan ona formasaun barak kona-ba aihan nebe riku ho nutrisaun husi Formador TOMAK.

Mauricio Gusmao hatutan, tuir nia observasaun katak membru Grupo sira iha ona konhesementu naton kona-ba oinsa atu diversifika produtu lokal ba aihan ho nutrisaun diak, no liu husi kompetisaun ne’e mos Parte World Vission no parte Saude bele identifika ona membru Grupo sira nia frakeza.

Aleimde ne’e, Xefe do Suco Triloca Alexandre Da Costa husu membru Grupo sira atu fahe tutan esperensia nebe iha ona ba komunidade seluk atu prepara aihan ho nutrisaun diak ba Familia.

Ana Monica nudar manan nain 3 Lugar iha kompetisaun ne’e hateten: sira sei hakaas an liu tan no buka atu komprende diak liu kona-ba aihan nebe iha nutrisaun bo’ot ba bebe, inan isin rua no inan fo susu sira.

Manan nain ba eventu kompetisaun ne’e mak 1 Lugar Grupo 11 husi Suco Bucoli-Lequiloiwatu, 2 Lugar Grupo 3 husi Suco Hostico-Haunau no 3 Lugar Grupo 5 husi Suco Triloca.

Clubu Parente nebe tuir kompetisaun ne’e hamutuk Grupo 15, komposto husi Suco 5 mak hanesan Suco Ossowala, Loilubo, Hostico, Bucoli no Triloca. iha kompetisaun ne’e parte World Vission mos fahe premio ba manan nain sira.

Jurista ba kompetisaun ne’e mak, Sebastiao Dos Santos Belo Coordenador extensionista Vemasse, Infermeira Maria Gorete Responsavel programa Promosaun Saude no Educasaun iha Centru Saude Bucoli (CSB) no Infermeira Gertrudes Lurdes Moreira Freitas nudar Responsavel nutrisaun iha CSB.

Partisipa iha Eventu kompetisaun Tein ne’e Autoridade Lokal husi Suco 5, pessoal Saude, Exensionista no Komunidade balun.

Jornalista: Litha Marques

Editor: Jally Silva

Comment